Augustinus Hipponensis

Expositio quarumdam propositionum ex epistola ad Romanos

Caput 2

8. [9.] (Rm 2,5) Quod autem dicit: Thesaurizas tibi iram in die irae, iram Dei ubique loquitur pro vindicta.
Idcirco ait: Iusti iudicii Dei.
Notandum autem quoniam et ira Dei ponitur in Novo Testamento, quod cum in Vetere legunt homines, qui legi veteri adversantur, culpandam eam putant; cum Deus utique sicuti nos perturbationibus non subiaceat, dicente Salomone: Tu autem Domine virtutum cum tranquillitate iudicas.
Sed ira, ut dictum est, in vindictae significatione ponitur.

9. [10.] (Rm 2,15) Quod autem dicit: Contestante conscientia illorum, secundum illum locum loquitur Ioannis apostoli, quo ait: Dilectissimi, si cor nostrum nos reprehenderit, maior est Deus conscientiae nostrae, etc.

10. [11.] (Rm 2,29) Quod autem dicit: Spiritu, non littera, hoc est, ut secundum spiritum, non secundum quod habet littera, lex intellegatur, quod utique contigit illis, qui circumcisionem magis carnaliter quam spiritaliter acceperunt.

11. [12.] (Rm 2,29) Quod autem dicit: Cuius laus non ex hominibus sed ex Deo, illi convenit quod ait: Qui in secreto Iudaeus est.